આ એકાગ્રતાનો નાવિક લઈને,
ચિંતાઓ બધી બાજુ પર મૂકીને,
જ્ઞાનનો અખૂટ સમુદ્ર ખૂંદવા,
હું પ્રચંડ ઇરાદા સાથે નીકળ્યો છું,
સફળતાનો દરિયો ખેડવા...
આ મુશ્કેલીઓથી તરબોળ થયેલા,
દરિયાના ઉછળતાં પ્રચંડ મોજા પણ,
રોકી નથી શકતા મને આગળ વધતાંં,
હું પ્રચંડ ઇરાદા સાથે નીકળ્યો છું,
સફળતાનો દરિયો ખેડવા...
આ બાહુબળથી બનેલા હલેસાં સાથે,
હું વિશ્વાસની નાવ લઈને નીકળ્યો છું,
દરિયાની પ્રચંડ લહેરોને કાપવા,
હું પ્રચંડ ઇરાદા સાથે નીકળ્યો છું,
સફળતાનો દરિયો ખેડવા...
આ મહેનતના ખીલા ઠોકી ઠોકીને,
વિશ્વાસના મજબૂત પાટિયાં ગોઠવીને,
દરિયાની વિશાળતાનું માપ કાઢવા,
હું પ્રચંડ ઇરાદા સાથે નીકળ્યો છું,
સફળતાનો દરિયો ખેડવા...
આ સંયમનું ટકાઉ કાપડ લઈને,
શઢ બાંધ્યો છે મેં ધીરજનો,
સમયનો વહેતો વાયરો ઝીલવા,
હું પ્રચંડ ઇરાદા સાથે નીકળ્યો છું,
સફળતાનો દરિયો ખેડવા...
- પાર્થ પ્રજાપતિ
ખૂબ સરસ... પ્રેરણાત્મક કવિતા
જવાબ આપોકાઢી નાખો