પોસ્ટ્સ
કવિતા
ફટાફટ તો થતી નથી પણ
અચાનક
જરૂર થઇ જાય છે.
આજે કવિતાની કરીએ કવિતા.
સમજાય કે ફટાફટ ના થાય છે કવિતા,
ને તે છતાં અચાનક થઇ જાય છે કવિતા.
જ્યાં કોરો હોય કાગળ ને શ્યામ વર્ણ શાહી,
ત્યાં આવતાં કદી ના અટવાય છે કવિતા.
સામે કિનારે બેસી લલચાવતી ઘણાંને,
ના એમ કોઇનાથી લલચાય છે કવિતા.
લઇ જાય મૂળમાં ને આવે ય મૂળમાંથી,
ઓછા જણાને મૂળથી વરતાય છે કવિતા.
ગેબી અવાજ આવે ત્યારે જ સંભળાતી,
બેસીને કોઇ ભીતરથી ગાય છે કવિતા.
સમજાવવા ભલેને દુનિયાને હું મથું પણ,
પૂરી મને ન કોઇ સમજાય છે કવિતા.
કવિયો ઘણાં થયા છે એની ખુશીને બદલે,
શા કારણે મનોમન દુભાય છે કવિતા?
શબ્દાવલી ભલેને કક્કાની હોય તો પણ!
બાવન બહાર દ્વારા સર્જાય છે કવિતા.
- વ્યાસ વાણી
બાંહેધરી:- આથી હું ભદ્રેશ વ્યાસ ખાતરી આપું છું કે આ કવિતા મારું મૌલિક સર્જન છે.જે એ કોઈની નકલ પૂરવાર થાય તો કાનૂની પગલાં ભરવાનો આપને અધિકાર છે.
ટિપ્પણીઓ નથી:
ટિપ્પણી પોસ્ટ કરો
Please Give your valuable comments and Don't enter spam link in comment box.